گالولي عنك .......

شهگة المذبوح من يفور دمه

يا محطات وسفر ......

ومشابگ البوسات بسمه

بفي تراچيك ينام گليبي ساعه

وينزع ثياب الحزن عن جلد همه

گالولي عنك ......

تخاف من تعب الليالي يصير نار

ويحرگ سنين العمر ويطفي اسمه

ولا تلوم جروف گلبي المولحت

وچان مايك فيض من يجبل تلمه

ياغناوينه ألهجرها الناي مده

وبينه عربيد التجافي زرع سمه

گالولي عنك مو إلي للناس عطرك

گلت مكتوبه عليه وهاي قسمه

ياما وجيت السنين شموع ليك

حتى دربك ماتلوحه چفوف ظلمه

بهيده يالرايح توچي بغير بختي

ردلي گلبي اليبسيته ولا تقسمه

ثوبي الأسود ما تبدل ذاك هو

ومطرت عيوني مزنها وبدت تعمه

خلها چلمات العذر خرسه علشفتك

گلي شيفيد العذر للساح دمه ؟؟

ما رضيت الهوى البارد من يمرك

بلا ثمن عمري لعذالي تسلمه

وهيه قسمه ........... شلون قسمه؟؟؟

خليل الشوك الموسوي