عساها تخضر التينه

ونمد بفيها السواليف

خبزه وستكين چاي وراحة بال تكفينا

وعلى إركَبَّكْ

مثل ما چنا وإحنا زغار

ننسه رواحنا

ونغفه لهذاك الصوب

ياخذنا السعف ل الله ... ويرد بينا

مظفر النواب

لمحتك جاي ..!

لمحتك جاي ..

لمحتك جاي و كَليبي علن انذار

و لجم جرحه الغميج و فكلك اضماده

بس كونك تجي و تمر علي خطّار

ل امد روحي الك و افرشها سجّاده

و مثل متأملت الراده كلبي صار

لأن ربّك كريم و يكرم اعباده

و لكَيتك جايني يا ساحر الأنظار

و صرت عني ابقرب جن ركَبه و كَلاده

و قبلت اضيافتي و ضوّيت كل الدار

و هفت جمر الدِلال و نفّض ارماده

و لأن دمّك شَكَر و مضبّط المقدار

الكَهوه ابحضورك تنشرب ساده

بحُبّك صخّنت جيب اصبعك محرار

و حط جفّك ابكَصتي ايصير كمّاده

حواسي الخمسه كلها ابحالة استنفار

و بعد احتاج خمسه و يمكن ازياده

شلحك بيك و انته امنين ما تندار

الف نجمه اعله طولك تضوي كالعاده

و شيفيد الكلب لو صار طير و طار

و انا ارموشك شفتها ابتوت مصياده

صرت فورًا فريسه و صحت يا ستار

من اعيونك رمتني و جتني هدّاده

و آنه اعزل مسالم اكتب الأشعار

ما يوم المسدّس ضاغط ازناده

تجي ابعُدّه و عِتاد الفارس المغوار

خطر حبّك دكَلّي اشلون اتفاده

و آنه استسلمت من أوّل المشوار

دخُف بطشك عليّه و كافي تتماده

و اقبلني اسير و كافي تطلق نار

للسجن المؤبد كلبي تقتاده

آنه احجيتلك ما عندي بعد اسرار

دحط بيدي الحديد و كثر اصفاده

مو انته الدليل و تعرف المضمار

تندل الطريق و حاسب ابعاده

جا هيج الشهم يستقوي عالمحتار

بدل ما ينصحه و يحاول ارشاده

يمعوّد دخيلك اسمع الأخبار

انا كَلبي بون بس حقق امراده

شعددلك بعد تطلبني كلي ثار

احضّرلك عمامي و امشي عالساده

بقالي بس خيار و ماكو غيره اختار

بحر حبّك لَعبره ابغير نجّاده

و اذا حبّك بحر بس كَلبي هم بحّار

على مد الخطر ما ينثني اعناده

سرمد اسطيفانا / استراليا