لأن طيب كسرت بخاطري يهواي

مثل كسرة بريء و راح لاعدامه

يالمطشر كياني شما المّن بيه

يبو طبع الحجر من يردم الجامه

يالجيتك علي جن جيّة استعمار

من استعمر بلادي و نكّس اعلامه

ذرعاني الك شالت مشاعل نور

ذرعانك معاول جتني هدّامه

ال يبصم عالخيانه و يغدر الخلّان

يكون احسن إله لو يبتر ايهامه

هيج الدنيا دارت بالعكس ويّاي

نهاري جن جحيم و ليلي ما نامه

بجادر تعزيه و محّد لكيته ينوح

و انا ناصب عزا و محتاج لطّامه

ما ظلّي رفيج ايهوّن الصعبات

صياد الوكت و يرامي بسهامه

و رغم ظهري انجرح من كثرة الطعنات

لكن ما حنيته و لا رخه احزامه

انا شاعر مواقف ثابت و مهيوب

الدنيا اتبدّلت ما بدّل اقلامه

يكابر في زمن بي مغريات اهواي

على بيع المبادىء حاول ارغامه

لكن مستحيله و ما تصير ابيوم

يدنّج ركَبته و يحني اله هامه

سرمد اسحق اسطيفانا