إلى ولدي المرحوم عبدالكريم ابوفهد الذي توفي بالسكته القلبيه قبل أكثر من خمس سنوات وهو في ريعان شبابه رحمه الله وهذه القصيده استذكاريه اعيد نشرها لمصادفة

هذه الايام الذكرى السادسه لوفاته..-

،،،اشلون يبني ،،،

اشلون  يبني !؟

،..اشگد بچيت !؟

،..اوطولي گدرتًه اعله طولك مارهّم چفنّك عليٌه !

أشلون حالك وانته نايمّ عالتراب ...!؟

صفنتٌك بيّه عذاب..

صورتًك ضميتّها أبالي ونستني نقطه بسطور الكتاب..

والله يبنادم ردّت ابچي اعله روحي وچان موسم دمع عندي

غافلّت صبري وبچيت اعليك كلّي ..

اعذرني يلّي افجّعت روحي..الموت ضيعنّي ابعذابي يابو ضحكات الطٌريّه..

الصفنهّ ماترهّم عليك ولا عليّه..،

شفت طولك خشبّه مركونه اعلن سطحّ المغتسّل والصرخّه بيٌه..

انفاسي مخنّوگه وهواي ابغير ريٌه

ارموش عينك ودعتنًه چن يتامه ابمغربّيه

أنه ودموعي الغريبه  وذكرياتي وناسنه الصارت ضحيّه

چا ،فهًد،ودعتًه يمًن !؟

....چا،شهد، ظلّت خطيّه

العاب ،علوش، ابغرفتك مزهريه !

،صافنّه وتنده عليك ..

،وينك أنته أبيا زمان..أبيا مسيًه !؟

ياصحو لهاّك عنّه !؟

حته من اندفن يمك ما اظن الحگ عليك

بويّه چاوين المحابس والعطور وضحكتك والواهلية..!؟

ضايعه ويه الحلاة الچنت بيها اهناك مضمونه الوحشتي!

وينك أنته أبيا كهف دليني بيك!؟

امثلجه اچفوفي وعساها اتكون يمًك

والدموع أمن البواچي حفرًن ابوجهي سواجي..

وانته تدري نبچي كل لحظه عليك. اللي يمّر بيها خيالك

،تنزف الروح ابتعبها من غلاتك

،ياحلاتك...والطروش السافروا يم باب دارك فشلتها!

وأنه من يومك عفتها

بابك المسدود حيل ايعيل بيّه..،

والسچج مگطوعه يمي وكل ضوه أعيونك مخافر

المقبره اتفزز دمعتي..

الوحشه والشارع رقم سته اوصفنتي

صورتك عالباب تنشدني عليك..وأنته تنشدني اعله حالي !؟

هذا حالي يابو چلمات النديّه

الرايد ايشوف المأسي ايروح يمّك..اشعلمك نوح الفخاتي

وانته همساتك نوارس

چنت فرحه ابوجه طلاّب المدارس

اشراع چنت ابريح عالي ولاتبالي

اجدامنه اباب الگبر متحزمات..بينها اوبين اللحّد شمرّة عصا

ويلي يلمابيك صوت ولا كو! حسّ

الصفنه تلحگني وتگلي كافي اس

چان طولكً هيبه والباب اشعلاته ايبوس راسك

هاي ناسك والحبايب..والرموش العاشرنكّ..

والله لو تدري ابغصن گلبي عطش چاحنيت اضلوع نهرانك عليّه..

ويلي يلمابيك جيهّ..

اشلون ودعًت الأهل غفله ومشيت !؟

حتهً قمصانك الحلوه الطرًزتها فاهيهّ وتنشدني عنّك

صرنه مثل ،اولاد مسلم ، وين تلگانه وتجينه

أعيونك التركض وراك استغربتنه !

دنيتك مو مثل الأول ابقه مرتاح ابمكانك

غيٌض طفّه اعيون گلبك وأنتچيت؛!؟

أنه ماشايف گبر يعشگ سماه!

اسنين ويعود المسافر

يبني روح اوداعة الله

أنته يمً ،حيدر علي الكرار، وگبالك عساكر

الوحشه سوّتلك مقابر

ابقه أقره ابراحتك كل الدفاتر

......؟؟

سفاح عبد الكريم / كربلاء