هالمره عندي حزّوره

و اكتبها بلغة الأشعار

ما جانت فد مرّه ابّالي

و راح اشرح شنهي اللي دار

فكره غريبه اجتّي فجأه

غفله ابلا سابق إنذار

حزّوره و مو كلش صعبه

ما بيها  الغاز  و أسرار

منهو اللي ايحلها اوّل واحد

منو يصبح بطل المضمار

الفايز آني اصفّكله

و اهديله باقة ازهار

و الخاسر ربّي اللي ايعوضه

و ماريد أمن الفاز ايغار

الحزوره عن اثنين

واحدهم للثاني جار

لا يمكن ابدًا يفترقو

واحد تك الثاني صار

لا يوجد حاجز يفصلهم

لا جدران و لا أسوار

نفس الشكل و نفس الطول

نفس الهيئه و الأطوار موجودين ابكل سيّاره

و هُمّا ايشغلون التيار

ينطون الطاقه المطلوبه

نفس الكم نفس المقدار

لولاهم ما تمشي خطوه

و لا تكدر تكطع مشوار

فرق اوحيّد بيهم صاير

واحد بارد واحد حار

منو بيكم يا شاطر هذا

ال حلها و ما ظل محتار

خل يتفضّل و يجاوبني

و نحط اسمه اويه الشطّار

سرمد اسطيفانا / استراليا