تتخايل اگبالي نجم

والسمه چن سـِـكـَّة سـفر

تتخايل ابگلبي گمـر

والغيمه مستحيه تمر

الليل يالون الكحل

وآشلون حاصرني المطر..؟

واسنيني تعبهه السـفر

هانت .. اولا فاد الصبر

وينه الصبر..؟

*

چم عيد راح اوهم إجه

ماشفنه فرحه اولا أمل

بطلنه نحلم..

والحلم فزّ اونفر

مرّ الشته..اوجانه شته

والصيف راح اوهم گضه

امسنين انطوت ويه العمر

ما شفنه .. بيهه بس غدر..

وايام تعبهه الصبر

ليوين .. بسك تنتظر!!

بسك حزن .. كافي قهر

كافي قهر

*

اتخايلك گمره اوربيع

والطيرغـَـنـَّه ومبتشر

واشموع فرحتنه ضوت

واعيون ضحكتنه فجر

لوجوه فرحانه إجت

متوشحه ابخيط الشمس

و انه اسمع الناي العـِـزَف

يتناغه وي موج النهر

ياروحي .. چن طال الحلم

ظلمه ولايبزغ بدر ..

الروح تربي تظل

واللعبه چن لعبة قدر

لعبة قدر....

ميسون نعيم الرومي