اتكضني قيود كبري وسمعتي وماجيك

بس انته اشيكضّك هم عليك قيود

استاهد حنانك مثل سيل الماي

اشغيَّر دليلك وأنگلب جلمود

هدهد طب سبأ وبشرلك اسليمان

گلب الولد لمّه وماتكضّه احدود

گلّي اصَّبَّراك وساكن ابتكساس

يربات المضايف والكرم والجود

انته ابعفّت امك چنت تحلف دوم

وبچرغد شعرها العلّماك الزود

من حسچت هلك متفوتك احچايات

استلهمت الحِكَم والتفَگ والبارود

گلّي اشعوّداك وساكن ابنص ناس

ماتعرف كلام العيب والمنگود

تذكّر محاري البيها عشت اسنين

وأهلك والعمام وطاعة المعبود

ولوعدت زلمهأ الطايفه افّد يوم

انته ويالزلم يفلان مومعدود

گلبي انصاب منك والجرح چتال

موچيلة غشيم ابتفگت الصّايود

امّك رايده اعله ايدك ييمّه اتموت

احضَرهأ وتريدك بالدفن موجود

ارجع لاتظل خطّار عند الناس

وفرشلك طريجك من ترد  ردود

*نعيم رمضان الخيگانيَ