الى اخي وصديقي رفيق العمر المهندس عبد الله عويز الجبوري

رحمه الله واسكنه الفردوس الاعلى في الذكرى السنويه الرابعه لرحيله

يارب الانس والجان...

يل خليتني ابلا خِل ازامط بيه

وخذت من المضيف الدلّه والفنجان...

يارب الانس والجان..

سفينه و البحر هايج...

شيقود السفينه لو مشه الربّان...

يارب الانس والجان..

موحش يادربنا والمنايا اجبال

ياذلّة صبرنا بوحشة الوديان...

أنا امفارك ودمعي

بموك عيني ايفور..

والخيمه سكف من تندفن عمدان

يسوار الشدايد ياعجيد الكوم

يمّراية عمامه وللفخر ميدان...

ضميتك بكلبي اسنين يابو اسنين..

واضلوعي بهواك السجن والسجّان..

ياصل الحماد المايطخ الراس

يمبدّل اوجوه الخاصموك الوان...

يحلّال الوشيعه الخلبصاها الضيم...

ياحمّاي ربعه من يطك الدان...

لمني بصم اديك الخوف دك الباب

يجويني الجمر من يصعد الدخّان...

آنه من الحزن شكيت ستر الليل..

وجويريد ضكني وماكلت بردان..

يارب الانس والجان....

تختار العزيز وشمعدان البيت..

وتعوف السنافر ذيل للغمّان..

شكتب من اريد انعيك.. لو ارثيك..

ميكفّيني ابجي الطم لطم معدان..

دكات الكلب تتسابك بملكاك..

ويحزّمك احزام بلهفته الشريان..

يوجعني المفارك والحنين ينوح..

وانت بكل كتر خليتلك نيشان..

انشدمن علي لو حسن لوعمّار..

لو انشد علا و حسين  لوعباس

لا بغداد تحجي ولاحجت عمّان..

توجعني الجروح ابلا ونين اتنوح..

ماترهم نفاهه الوكت نص اردان..

جمّار النخل ماخذ سمار الليف..

ويمولح العنبر من تخلطه ادنان..

مهيوبه المساحي من تشك الكاع..

بس خرسه وذليله بحضرة الدفّان...

يارب الانس والجان..

عبد الله مشه وعاف الوطن تعبان..

اخذ صوغه بجنطته الكرم والاحسان..

مو كتلك اذا رايح اخذني اوياك..

شو خليتني ابداري بقايا انسان...

محمد المحاويلي