ياهور الجبايش!

ياهور الجبايش لاتسد الشط

يا مجمن سمج ريجان يتلعبط

يبو العكيد يالشبعت طير البط

براهينك على المحداد تشبع غط

يدهله وطين فوك الطين ومسدي حشيس اخضر

شحلات الصيد بيدك ودفعة المردي

وحلوة شيلة الفاله لبو سراج الشعل لاله

اوصايود الدست ودراغه يبراله

يفرح لو سمع فحل الجمس ينحط

ياهور الجبايش لا تسد الشط اكلك لاتسد الشط

خلي شطك بزوده وخلي نبت الكعيبه على سطح الماي موجوده

وخلي الكاط المفيح الجاري يلعب بعوده

بالك تدش بغواره

جبير وصعب معباره

نبت ماينبت بداره

يشعله ايظل على الصوبين يتخبط

ياهور الجبايش لاتسد الشط

ياهور الجبايش هيلك وفنك

تجاوبني الحقيقه منرد انشدنك

انشدك وين أهالينا مضايفنه ومبانينه

جبح ياهور ناسينه

ولا جنه تزاركنه بكصب هورك المخرب

ولا جنه ركبنه بسدر ماطورك

ولا جنه تزاركنه بكصب هورك

ولا تذكر كصبنه كناغ عشرتنه ورمي طيورك

نسيت الشص نسيت طيور الوريده

شحم بالموسم امكلص

حسافه شلون تنسانه

نسيت البردي المصفط

ياهور الجبايش ياجثير البك

يا مجمن حيايا آفات تتمزرك

على ركمة مشاحيفك سمج بالنار يتعلك

ياما كصت الكطان طكها معيدي بالمطرك

حلال بربعة المشحوف بني الهور من ينشك

ماتنسه رفيف الكصب لمن يدحج المشحوف

روحي اطوف ياهور الجبايش بيك روحي اطوف

بالخريط الأصفر بالكصب مصفوف

برشيح الماي فوك الكصب لو نكط

ياهور الجبايش لا تسد الشط

اكلك لا تسد الشط. ..

المرحوم مجيد جاسم الخيون